ချန်ပီယံလိဂ် မှာ ကံ မကောင်းခဲ့တဲ့ မန်စီးတီး

ချန်ပီယံလိဂ် အုပ်စုအဆင့် ပွဲစဉ်(၅)၊ ဒုတိယနေ့တွင် အာဆင်နယ် အသင်း အနိုင်ရကာ နောက်တစ်ဆင့် တက်ရောက်ခဲ့ပြီး မန်ချက်စတာ စီးတီးမှာမူ အုပ်စု အဆင့်မှပင် ကျောခိုင်း ထွက်ခွာခဲ့ရပြီ ဖြစ်သည်။

မန်ချက်စတာစီးတီး ၁ - ၁ ရီးယဲလ်မက်ဒရစ်

မရဏအုပ်စုဖြစ်သော အုပ်စု(D)ပွဲစဉ်တွင် ရီးယဲလ်သည် မန်စီးတီးကို သရေကစားပြီးနောက် ဘိုရပ်ရှားဒေါ့တ်မန်နှင့်အတူ ရှုံးထွက်အဆင့်သို့ အောင်မြင်စွာ တက်ရောက်နိုင်ခဲ့သည်။ မန်စီးတီးတွင် ဆာဂျီယို အဂူရို၊ အီဒင်ဂျက်ကို၊ ဒေးဗစ်ဆေးလ်ဗား၊ အလက်ဇန္ဒား ကိုလာရော့ဗ်၊ ဆမ်မီနာဆရီ၊ ယာယာတိုရေး၊ ဒေါက်ဂလက်စ် မိုင်ကွန် အစရှိသည့် ကစားသမားများ ပါဝင် ကစားခဲ့သည်။ ရီးယဲလ်တွင်မူ ကီရင်ဘန်ဇီးမား၊ ခရစ္စတီယာနို ရော်နယ်လ်ဒို၊ လူကာမိုဒရစ်၊ အိန်ဂျယ်လ် ဒီမာရီယာ၊ ဖေဘီယို ကွန်ထရာအို၊ ပီပီအစရှိသည့် ကစားသမားများ ပွဲထွက်ခဲ့သည်။

ယခုပွဲတွင် ရီးယဲလ်အတွက် ဦးဆောင်ဂိုးကို ပွဲချိန် (၁၀)မိနစ် ကတည်းက ဘန်ဇီးမားက သွင်းယူခဲ့သည်။ ဒီမာရီယာ ဖြတ်ပို့လိုက်သည့် ဘောလုံးကို ဘယ်ခြမ်းမှ ပြေးတက်လာသည့် ဘန်ဇီးမားက လူကျွံထောင်ချောက်ကို ဖောက်ထွက်ပြီး ဂိုးသမား ဂျိုးဟတ်နှင့် အနီးကပ် အနေအထားမှ အပိုင်ကန်သွင်းသွားခြင်း ဖြစ်သည်။ ပွဲချိန် (၇၁)မိနစ်တွင်မူ အဂူရို ထိုးဖောက်လာမှုကို တားဆီးရန် ကြိုးစားရင်း ရီးယဲလ်နောက်ခံလူ အယ်လ်ဗာရို အဘီလိုအာ အနီကတ် ထိခဲ့သလို ရီးယဲလ်အသင်း ပင်နယ်တီပါ ပေးခဲ့ရသည်။ ထိုပင်နယ်တီကို အဂူရိုက အမှားအယွင်းမရှိ ကန်သွင်းပြီး မန်စီးတီးတို့ ချေပဂိုး ရရှိသွားသည်။ ထို့နောက်ပိုင်းတွင် ရီးယဲလ်က ပွဲကို မရှုံးအောင် ထိန်းကစားရင်း သရေရလဒ်ဖြင့် ပွဲပြီးကာ အုပ်စုဒုတိယ နေရာဖြင့် ရှုံးထွက်အဆင့်သို့ တက်ရောက်သွားခဲ့သည်။

အာဆင်နယ် ၂ - ၀ မွန့်ပယ်လီယေး

အာဆင်နယ် အသင်းသည် အိမ်ကွင်းတွင် လူးကက်စ် ပိုဒေါ့စကီး၊ အိုလီဗီရာ ဂီရော့ဒ်၊ အဲလက်စ်အိုလိဒ် ချိန်ဘာလိန်၊ ဆန်တီကာဇိုလာ၊ ဂျက်ဝီလ်ရှိုင်းယား၊ သောမတ်စ် ဗာမေလန်စသော ကစားသမားများကို ပွဲထုတ်ပြီး ပြိုင်ဘက်ကို တိုက်စစ်ဆင် ကစားခဲ့သည်။ အုပ်စုတက်ရေး မျှော်လင့်ချက် ကုန်ဆုံးနေပြီ ဖြစ်သော်လည်း ပြင်သစ်ချန်ပီယံ မွန့်ပယ်လီယေးသည် ဂေတန်ချာဘိုနီရာ၊ အန်သိုနီ မော်နီရာ၊ ယိုနက်စ် ဘယ်လ်ဟန်ဒါ၊ မာကို အက်စ်ထရာဒါ၊ ဟန်နရီ ဘက်ဒီမို၊ ဒင်နီရယ် ကွန်ဂရီ အစရှိသည့် အဓိက ကစားသမားများ ပါဝင်ကာ အာဆင်နယ်ကို ရင်ဆိုင်ခဲ့သည်။

ယခုပွဲစဉ်တွင် ပထမပိုင်း၌ (၂)သင်းလုံး ဂိုးမသွင်းနိုင်ခဲ့သော်လည်း ဒုတိယပိုင်းတွင် အာဆင်နယ်က (၂)ဂိုးဆက် သွင်းယူကာ အနိုင်ရရှိခဲ့ခြင်း ဖြစ်သည်။ ပွဲချိန် (၄၉)မိနစ်တွင် ဗာမေလန် ကန်တင်ပေးလိုက်သော ဘောလုံးကို ဂီရော့ဒ်က ခေါင်းတိုက် ချပေးလိုက်ရာ ကွင်းလယ်လူ ဝီလ်ရှိုင်းယားက ဂိုးသမားနှင့် အနီးကပ် အနေအထားမှ အသာအယာ ကျော်ကန်ပြီး ဂိုးသွင်းယူခဲ့သည်။ (၆၃)မိနစ်တွင် ဂီရော့ဒ်ပင် ဖန်တီးပေးသည်ကို ပိုဒေါ့စကီးက မြေမကျ အပြင်းကန်သွင်းကာ အာဆင်နယ်အတွက် ဒုတိယဂိုးကို ရယူပေးသွားခြင်း ဖြစ်သည်။ ယခုပွဲစဉ် အနိုင်ရလဒ်နှင့်အတူ အာဆင်နယ်သည် သေချာပေါက် ရှုံးထွက်အဆင့်သို့ တက်ရောက်သွားခဲ့သည်။